Gengið hefur verið frá sölu Burðaráss á 94,1% hlut í Eimskipafélagi Íslands til Avion Group. Einnig stefnir Avion Group að kaupum á 5,9% hlut P/F Tjalds í Eimskipafélaginu og þannig eignast félagið að fullu. Með þessu verður til stærsta félag landsins í flutningastarfsemi með 110 milljarða króna veltu, 4.400 starfsmenn og 80 starfsstöðvar um heim allan.
Heildarsöluverð félagsins er 23 milljarðar króna og er söluverð hlutar Burðaráss því 21,6 milljarðar króna. Þar af eru 12,7 milljarðar króna greiddir með peningum og 8,9 milljarðar króna með hlutabréfum í Avion Group en fjöldi hluta verður endanlega ákvarðaður við skráningu Avion Group í Kauphöll Íslands. Stefnt er að skráningu Avion Group í Kauphöll Íslands eigi síðar en 31. janúar 2006. Náist þetta markmið ekki hafa stærstu hluthafar Avion Group skuldbundið sig til að kaupa áðurnefnda hluti af Burðarási á sömu kjörum.
Með fyrirvara um samþykki hluthafafundar Burðaráss skuldbindur Burðarás sig til að ráðstafa jafnvirði 5 milljarða króna af eignarhlut sínum í Avion Group til hluthafa Burðaráss í formi arðs.
Friðrik Jóhannsson, forstjóri Burðaráss, segir um söluna: ?Með þessari sölu verður til öflugasta flutningafélag landsins en salan á Eimskip er í samræmi við áætlanir forsvarsmanna félagsins um sölu Eimskipafélagsins og skráningu þess í kauphöll. Verðið sem Burðarás fær fyrir flutningafélagið er mjög gott og er innleystur söluhagnaður fyrir skatt um 15,5 milljarðar króna. Það er því ljóst að afkoma Burðaráss á árinu verður mjög góð. Burðarás telur einnig að með þessum samningi sé tryggt að hluthafar félagsins eigi áfram eignarhlut í öflugasta flutningafélagi landsins."
Samningurinn er gerður með fyrirvara um fjármögnun kaupanna og að hluthafafundur í Avion Group samþykki útgáfu þeirra hluta sem afhentir eru Burðarási í viðskiptunum.
Fyrirtækjaráðgjöf Landsbankans var ráðgjafi Burðaráss í viðskiptunum.
