*

sunnudagur, 29. nóvember 2020
Innlent 29. nóvember 2017 14:40

Byggja sundstað við hlið Skúla

Eyþór Guðjónsson og Jakob Sigurðsson fengu lóðina við hlið væntanlegra höfuðstöðva Wow air fyrir heilsuparadís.

Ritstjórn

Eyþór Guðjónsson eigandi Skemmtigarðsins í Grafarvogi ásamt Jakobi Sigurðssyni, fyrrverandi forstjóra Promens og VÍS hyggjast opna baðstað, líkamsræktarstöð, veitingahús og ýmsa útivistartengda afþreyingu við strandlengju Kársness í Kópavogi.

Einkahlutafélag þeirra félaga, Nature Resort, keypti í byrjun árs lóðirnar Vesturvör 42 til 48 af bæjarfélaginu að því er Fréttablaðið greinir frá. Eyþór segir engin tengsl vera á milli verkefnisins og áætlana Skúla Mogensen forstjóra Wow air um uppbyggingu höfuðstöðva flugfélagsins og hótels á næstu lóð við hliðina.

Hyggjast velta milljörðum

„Ætlunin er að búa til heilsuparadís fyrir alla höfuðborgarbúa,“ segir Eyþór en upphaflega hafði hann verið að skoða lóð á Gufunesi fyrir verkefnið sem ekki fékkst, en hugmyndin er tíu ára gömul.

„Til lengri tíma mun verkefnið velta milljörðum en hins vegar ætlum við að taka eitt skref í einu og byggja upp af skynsemi og byrja á heilsulindinni, veitingastað, kaffihúsi, líkamsrækt og jógaaðstöðu og aðstöðu fyrir hjóla-, göngu- og aðra útivist.“