Bílasala í Butler í Missouri í Bandaríkjunum hefur tekið upp nýstárlega aðferð til að selja bíla. Með hverjum bíl er boðið ókeypis eldsneyti að andvirði 250 dollara eða ókeypis, hálfsjálfvirk skammbyssa. Þetta hefur mælst misjafnlega fyrir í Bandaríkjunum en bílkaupendur hafa tekið þessu opnum örmum og 80% þeirra hafa valið skammbyssuna fram yfir eldsneytið.
„Eldsneytisverð er ískyggilega hátt og við búum við þjófnaði, vopnuð rán og saklaust fólk verður fyrir barðinu á ofbeldi,“ segir Walter Moore, talsmaður Max Motors í Butler. Hann virðist hafa dottið niður á lausn sem hentar bandarískum bílkaupendum því, eins og fyrr segir, 80% viðskiptavina Max Motors hafa valið skammbyssuna að gjöf. Moore kveðst ekki skilja allt fjaðrafokið í ljósi þess að langflestir viðskiptavina hans eiga byssu fyrir. Þeir sem velja byssuna fá afhendingarseðil sem þeir leggja síðan inn hjá skotvopnasala í Butler. Eftir að tilskilin leyfi og athugun á væntanlegum byssueiganda hefur farið fram fær hann byssuna afhenta.
