Snorri Jakobsson, sérfræðingur hjá Capacent, segir að í skráningarlýsingu Eikar hafi vantað allar upplýsingar um stóran hluta rekstrarins en Eik var skráð á markað í apríl. Þetta kemur fram í Morgunblaðinu í dag.
Capacent vann skýrslu um fasteignafélögin í kauphöllinni. Þar segir að fasteignafélagið Eik hafi varla tækt til verðmats við skráningu þar sem í skráningarlýsingu voru engar fjárhagsupplýsingar um Landfestar sem Eik yfirtók á árinu 2014.
Að sögn Snorra á að vera hægt að meta framtíðarhorfur í lýsingu samkvæmt lögum um verðbréfaviðskipti. Í samtali við blaðið segir Snorri „Rekstur félagsins byggist á tveimur félögum en ekki einu. Það er því mjög sérstakt að birta bara fortíðarrekstur eins félagsins þegar framtíðarrekstur og verðmæti félagsins byggist á rekstri tveggja félaga.“
Gagnrýna einnig útboð Reita
Capacent gagnrýnir líka útboð Reita sem einnig fór fram í apríl. Í skýrslu Capacent segir að Arion banki, þáverandi stærsti eigandi bæði Reita, hafi setið beggja vegna borðsins og ákvarðað útboðsgengi. Þannig hafi bankinn verið bæði í hlutverki fjárfestis og þjónustuaðila. Í samtali við Morgunblaðið segir Snorri að þetta þætti vart eðlilegt í nágrannalöndum okkar.
