Capacent: Markaðsvirði Össurar of hátt

Capacent telur að verð félagsins Össur á markaði sé of hátt. Þrátt fyrir það telur greiningaraðilinn að Össur hafi skilað fjárfestum góðum arði. Í nýju verðmati Capacent á Össuri, sem að Fréttablaðið hefur undir höndum og fjallar um, er Össur metinn á 1.525 milljónir Bandaríkjadala sem jafngildir 158,6 milljörðum króna og verðmatsgenginu 369 krónur á hlut. Gengi bréfa í félaginu var 470 krónur þegar verðmatið var gert, 2. ágúst, og er því matið um 21% undir markaðsgengi.

Greinendur Capacent eru á því að uppgjör Össurar á fyrstu sex mánuðum ársins hafa valdið vonbrigðum. Þeir benda á að rekstraráætlun félagsins hafi verið endurskoðuð. Félagið gerir ráð fyrir að EBITDA-hlutfallið verði átján til nítján prósent, en ekki nítján til tuttugu prósent eins og áður var gert ráð fyrir. Einnig hafi innri vöxtur Össurar á Ameríkumarkaði verið takmarkaður eða um eitt prósent. Einnig benda þeir á að sala stuðningsvara hafi dregist saman nær samfellt frá árinu 2014.

Greiningaraðilar taka þó fram að rekstur Össurar hafi verið sterkur og EBITDA-hlutfallið hátt eða um nítján prósent að meðaltali á árunum 2010 til 2016. Þá geri Capacent ráð fyrir því að hlutfallið verði komið í 20,1% á næsta ári og 20,8% árið 2021. Greinendur Capacent segja enn fremur að framlegðin sé há markaðnum fyrir framleiðslu stoð og stuðningstækja, og því sé líklegt að að fleiri vilji „komast að veisluborðinu“.