Bandaríski bíllinn Chevrolet Volt verður frumsýndur á Íslandi í dag en það er Bílabúð Benna sem flytur bílinn inn. Volt er bæði rafmagnsbíll og bensínbíll en bíllinn getur framleitt raforku í bensínakstri. Samkvæmt kynningu bílsins á hann að komast um 60 km á rafhleðslu en eftir það tekur bensínnotkunin við.
Benedikt Eyjólfsson, eigandi Bílabúðar Benna, segir í samtali við Viðskiptablaðið að bíllinn henti vel við íslenskar aðstæður. „Fólk getur notað þennan bíl í alla keyrslu innanbæjar og ólíkt öðrum rafbílum er einnig hægt að nota hann í utanbæjarakstur þegar svo ber undir,“ segir Benedikt. Volt var útnefndur Bíll ársins 2011 af bæði Automobile Magazine og fagritinu Motor Trend. Hann hefur jafnframt hlotið sæmdarheitið „Umhverfisbíll ársins 2011“ hjá tímaritinu Green Car Journal.