*

mánudagur, 6. apríl 2020
Innlent 26. febrúar 2020 09:53

Coripharma fær tvo milljarða

Íslenskt lyfjafyrirtæki lýkur tveggja milljarða fjármögnun en félagið stefnir að markaðssetningu 13 nýrra samheitalyfja.

Ritstjórn
Bjarni K. Þovarðarson er forstjóri Coripharma.
Aðsend mynd

Coripharma hefur lokið rúmlega tveggja milljarða króna hlutafjáraukningu sem mun styrkja lyfjaþróun félagsins. Coripharma stefnir á markaðssetningu þrettán nýrra samheitalyfja á næstu þremur árum.

Tuttugu nýir fjárfestar koma nú að félaginu, auk eldri hluthafa Coripharma sem standa að baki um þriðjungs hins nýja hlutafjár. Fyrirtækjaráðgjöf Kviku var ráðgjafi Coripharma í viðskiptunum.

Coripharma er íslenskt lyfjafyrirtæki í eigu fyrrverandi starfsmanna Actavis og fjárfesta. Frá því að félagið hóf starfsemi sína árið 2018 hefur það keypt alla lyfjaframleiðslu og lyfjaþróun Actavis á Íslandi. Coripharma sérhæfir sig í framleiðslu og þróun lyfja fyrir önnur lyfjafyrirtæki um heim allan, ásamt því að þróa sín eigin lyf.

Áætlað er að fyrsta samheitalyfið undir merkjum Coripharma komi á markað um mitt næsta ár. Félagið gerði nýverið samninga við tvö erlend lyfjafyrirtæki: annarsvegar Midas Pharma um samvinnu við framleiðslu og markaðssetningu á lyfjum til þriðja aðila, og hinsvegar STADA, eitt stærsta lyfjafyrirtæki heims, um pökkun á 700 milljónum taflna af lyfjum árlega í þrjú ár.

Í kjölfarið fjölgaði störfum hjá fyrirtækinu, en hjá Coripharma vinna í dag 110 manns. Fyrirtækið gerir ráð fyrir að í lok ársins verði starfsmenn orðnir um 140 talsins.

Bjarni K. Þorvardarson, forstjóri Coripharma segir örugga fjármögnun vera gríðarlega mikilvæga til að tryggja öfluga lyfjaþróun og uppbyggingarstarf í lyfjaverksmiðjunni.

„Þróun á nýjum samheitalyfjum er kostnaðarsöm en þessi fjármögnun gerir okkur kleift að halda ótrauð áfram með markmið okkar að koma þrettán nýjum samheitalyfjum á markað og að verksmiðjan verði komin í full afköst innan þriggja ára,“ segir Bjarni.