Dagur B. Eggertsson, borgarstjóri Reykjavíkur, segir að betur hefði mátt undirbúa tillögu um sniðgöngu á ísraelskum vörum áður en hún var lögð fram og samþykkt í borgarstjórn Reykjavíkur í vikunni. Þetta segir hann í samtali við mbl.is .
Í viðtalinu gefur Dagur engar upplýsingar um hvaða vörur er að ræða. Tillagan var samþykkt á þriðjudag en þá baðst Björk Vilhelmsdóttir lausnar frá störfum sínum sem borgarfulltrúi og heldur hún til Palestínu í sjálfboðastarf. Var þetta lokatillaga hennar í borgarstjórn.
Dagur segir að kannski hefði mátt útfæra málið betur áður en tillagan var lögð fram. „Þetta tengist auðvitað líka því að þetta er lokatillaga Bjarkar sem er að hætta í borgarstjórn þannig að við gerðum þetta svona,“ segir hann.