ATP, stærsti lífeyrissjóður Danmerkur, hagnaðist um 125 milljarða danskra króna, jafnvirði rúmra 2.700 milljarða íslenskra króna. Þetta er methagnaður í sögu lífeyrissjóðsins og jafngildir því að eigið fé sjóðsins hafi aukist um fjórðung á milli ára.
ATP sankaði að sér hlutabréfum í stoðtækjafyrirtækinu Össuri árið 2010 en hlutabréf fyrirtækisins voru skráð á markað þar í landi í september 2009.
Lars Rohe, forstjóri ATP, segir í samtali við danska viðskiptablaðið Börsen, afkomuna skýrast af góðri en öruggri eignastýringu og dreifðri áhættu í fjárfestingum.
Eignir ATP námu í lok síðasta árs 579 milljörðum danskra króna samanborið við 475 milljarða ári áður.
Í uppgjöri sjóðsins kemur fram að hver sjóðsfélagi eigi að meðaltali 122 þúsund danskar krónur í sjóðnum, jafnvirði tæpra 2,7 milljóna íslenskra króna.
Sjóðurinn er gullkýr fyrir danska ríkið en hann greiddi 18 milljarða danskra króna, tæpa 400 milljarða íslenskra króna, í fjármagnstekjuskatt í fyrra.
