Árið 2018 hefur verið erfitt ár fyrir bresku verslunarkeðjuna Debenhams. Fyrirtækið hefur nú þegar sent frá sér 3 afkomuviðvaranir og hefur hlutabréfaverð þess lækkað um 63% það sem af er þessu ári. Samkvæmt frétt BBC hafa forsvarsmenn Debenhams nú leitað til ráðgjafa KPMG til að skoða alla þá möguleika sem fyrirtækið hefur til þess að bæta stöðu sína.
Samkvæmt BBC er einn þessara möguleika að fyrirtækið muni nýta sér greiðslustöðvunarákvæði í breskum lögum sem mun gera því kleift að loka verslunum og endursemja við leigusala og lánardrottna. Félagið skoðar það því alvarlega að fara í greiðslustöðvun og leita nauðasamninga til þess að rétta af rekstur þess.
Debenhams hefur nú þegar farið í aðgerðir til þess að draga úr kostnaði og var með meðal annars greint frá því í ágúst að 80-90 manns yrði sagt upp í höfuðstöðvum félagsins. Þá greindi félagið einnig frá því í febrúar að það hygðist skera niður verslunarstjórastöður um 320. Auk þess hyggst Debenhams selja eignarhlut sinn í dönsku verslunarkeðjunni Magasin du Nord en talið er að verðmæti hennar nemi allt að 200 milljónum punda.
