Walt Disney Co. hefur dregið verulega úr auglýsingaútgjöldum á Facebook, samkvæmt heimildum WSJ . Disney var stærsti auglýsandinn á samfélagsmiðlinum á fyrstu sex mánuðum ársins.
Afþreyingarfyrirtækið bætir sér í hóp hundruða fyrirtækja, þar á meðal Unilever, Starbucks, Ford og Verizon, sem hafa tímabundið hætt að auglýsa á Facebook.
Disney, ólíkt mörgum öðrum fyrirtækjum, tilkynnti ekki um sniðgöngu á samfélagsmiðlinum heldur dró hljóðlega úr auglýsingum. Fyrirtækið er talið hafa áhyggjur af framkvæmd Facebook á stefnum sínum varðandi vafasamt efni.
Sjá einnig: Þriðjungur fyrirtækja tekur þátt
Disney hefur tímabundið hætt að auglýsa streymisveituna Disney+, sem var hleypt af stokkunum í nóvember síðastliðnum, á Facebook. Útgjöld til auglýsinga vegna streymisveitunnar hefur vegið þungt í auglýsingagjöldum Disney í ár. Félagið hefur einnig hætt að auglýsa systur-streymisveituna Hulu á Instagram, dótturfyrirtæki Facebook. Hulu eyddi um 16 milljónum dollara á Instagram á tímabilinu 15. apríl til 30. júní.
Disney eyddi um 210 milljónum dollara á fyrri helming ársins í auglýsingar á Facebook, samkvæmt gagnaveitunni Pathmatics.
