*

laugardagur, 31. júlí 2021
Innlent 1. október 2014 10:48

Dohop tilnefnt til verðlauna

Íslenska flugleitarvélin Dohop hefur verið tilnefnd til World Travel Awards sem besta flugleitarvél heims.

Ritstjórn
Kristján Guðni Bjarnason, framkvæmdastjóri Dohop.
Aðsend mynd

Íslenska flugleitarvélin Dohop hefur verið tilnefnd til World Travel Awards verðlaunanna í flokknum „Besta flugleitarvél heims“.

World Travel Awards voru stofnuð árið 1993 til að vekja athygli á, verðlauna og hampa því besta í ferðabransanum á heimsvísu. World Travel Awards leita sjálf að því besta sem er í boði í ferðabransanum og tilnefning Dohop er frá þeim komin. Verðlaunin verða afhent í lokahófi World Travel Awards í Marrakech í Marokkó í lok nóvember.

“Það er auðvitað frábært að fá svona viðurkenningu. Dohop er þarna sett í flokk með fremstu fyrirtækjum heims í ferðabransanum, eins og Hilton, Carnival Cruises og flugfélaginu Southwest, sem öll eru tilnefnd í sínum flokki,” segir Kristján Guðni Bjarnason, framkvæmdarstjóri Dohop.

Dohop fékk í kjölfarið undirsíðu hjá World Travel Awards sem er sérstaklega ætluð kosningu fyrirtækisins. Sú síða er nú opin og allir geta kosið til 19. október, þó telja atkvæði þeirra í ferðabransanum tvöfalt á við önnur atkvæði. Árið 2013 bárust um hálf milljón atkvæða til tilnefndra fyrirtækja.

Stikkorð: Dohop