*

miðvikudagur, 12. maí 2021
Erlent 25. ágúst 2020 13:35

Fortnite bannið heimilað

Apple var þó varað við að skaða ekki fyrirtæki sem styðja sig við hugbúnað frá Epic Games.

Ritstjórn
epa

Bandarískur dómstóll hefur kveðið að Apple megi banna tölvuleikinn Fortnite frá App Store en að tæknirisinn megi ekki koma í veg fyrir að Epic Games, sem gaf út tölvuleikinn, útvegi hugbúnað fyrir önnur smáforrit í netversluninni. 

Héraðsdómarinn varaði Apple við því að skaða ekki fyrirtæki sem reiða sig á hugbúnaðinn ‚Unreal Engine‘ sem Epic býður upp á. Apple hafði hótað því að afturkalla aðgang Epic að hönnunarkerfi iOS stýrikerfisins. 

„Epic Games og Apple eiga rétt á að lögsækja hvort annað en deilur þeirra ættu ekki að skapa tjón fyrir hlutlausa aðila,“ er haft eftir dómaranum í frétt Financial Times

Apple fjarlægði Fortnite úr netverslun sinni eftir að Epic hafði fundið leið sem gerði notendum kleift að versla innan leiksins án þess að greiða Apple 30% þóknunargjald, sem ku vera brot á reglum App Store. 

Á síðustu dögum hafa iPhone símar sem innihalda Fortnite smáforritið farið í sölu á Ebay á uppsprengdu verði þar sem bann Apple hefur ekki áhrif á notendur sem höfðu þegar hlaðið niður forritinu. 

Stikkorð: Apple App store Fortnite Epic Games Unreal Engine