Pétur Blöndal, þingmaður Sjálfstæðisflokksins, segir að dómur Hæstaréttar sem féll í vikunni í máli kröfuhafa gegn þrotabúi gamla Landsbankans (LBI) sé stórtíðindi. Á Facebook síðu sinni segir hann að mikilvægi hans slagi upp í Icesave-dóminn fyrir Ísland.
Pétur vísar í texta dómsins þar sem segir að „...það þvert á móti í samræmi við skyldur þeirra og meginreglur kröfuréttar að við úthlutun sé aðeins borgað út í krónum.“
Þetta þýði að slitastjórnir verði að flytja heim gífurlegar eignir þrotabúanna í útlöndum (2.300 milljarða), skipta þeim yfir í krónur og svo sætu kröfuhafarnir eins og við Íslendingar með krónur á bak við höft og gætu sig ekki hreyft meðan höftin vara.
„Nú hafa kröfuhafarnir hag af því (ásamt okkur) að búa til forsendur fyrir því að höftin fari,‟ segir Pétur.
