Samkomulag hefur náðst milli PricewaterhouseCoopers ehf. og Eignaumsjónar hf. um að Eignaumsjón taki við allri starfsemi Húsastoðar ehf., dótturfélags PwC og annist alla þjónustu við viðskiptavini Húsastoðar, í samræmi við gildandi þjónustusamninga. Til lengri tíma litið er stefnt að sameiningu félaganna.
Engar efnislegar breytingar verða á samningum þeirra hús- og rekstrarfélaga sem eru í þjónustu hjá Húsastoð þegar Eignaumsjón tekur formlega við rekstri félagsins frá deginum í dag að telja. Sömu samningar eru áfram í gildi segir í fréttatilkynningu.
Jafnframt verður starfsfólk Húsastoðar, sem starfar áfram hjá PwC, bæði viðskiptavinum Húsastoðar og starfsfólki Eignaumsjónar innan handar næstu vikurnar á meðan gengið er frá formsatriðum.
„Við hlökkum til að takast á við þá áskorun að taka við rekstri Húsastoðar og erum þess fullviss að vel muni takast til, enda hefur Eignaumsjón verið leiðandi í þessari þjónustu allt frá því að félagið tók til starfa árið 2001,“ segir Daníel Árnason, framkvæmdastjóri Eignaumsjónar.
„Með tilkomu Húsastoðar sjáum við nú um hátt í 500 hús- og rekstrarfélög með nærri 12 þúsund íbúðum eða einingum. Áhersla okkar til framtíðar er að mæta vaxandi þörfum eigenda fasteigna með góðri þjónustu og skilvirkum lausnum sem byggja á gagnsæi upplýsinga og umhverfisvænum gildum.“
Sigurveig Friðgeirsdóttir, fráfarandi framkvæmdastjóri Húsastoðar segir það ekki falla að kjarnastarfsemi PwC að eiga og reka húsfélagaþjónustu.
„Mikil þróun hefur átt sér stað á þessum markaði og meiri þörf er orðin fyrir sérhæfðari þjónustu sem stærri þjónustuaðili á betra með að veita, enda rekstur hús- og rekstrarfélaga alltaf að verða flóknari og umfangsmeiri,“ segir Sigurveig.
„Við teljum það góða lausn að Eignaumsjón taki við keflinu, enda lögðum við upp með að öflugur aðili á þessum markaði taki við til að tryggja að vel verði hugsað um viðskiptavini Húsastoðar og hagsmuni.“
