Íslenskir neytendur eru síður til þess líklegir að ráðast í stórkaup nú en þeir hafa verið síðasta árið. Þetta má sjá úr niðurstöðum úr ársfjórðungslegum mælingum Capacent Gallup á fyrirhuguðum stórkaupum neytenda sem birtar voru í gær samfara Væntingavísitölu Gallup. Þannig lækkaði vísitalan um fyrirhuguð stórkaup um 4,5 stig frá síðustu mælingu í desember og mælist nú 47,9 stig. Er gildi hennar nú lítið eitt hærra en það var í fyrra en þá mældist vísitalan 46,1 stig.

Þetta kemur fram í Morgunkorni greiningar Íslandsbanka í dag.

Umfjöllun greiningar Íslandsbanka:

Dregur úr ferðagleði landans...
Vísitalan fyrir fyrirhuguð stórkaup er meðaltal fyrir vísitölur bifreiðakaupa, húsnæðiskaupa og kaupa á utanlandsferðum. Allar þessar þrjár vísitölur lækka frá mælingunni í desember, en þó mismikið. Í stigum talið var lækkunin mest á vísitölunni fyrir utanlandsferðir, sem mælir hversu líklegt er að einstaklingar komi til með að ferðast til útlanda á næstu 12 mánuðum. Á milli desember og mars fór vísitalan úr 133,4 stigum í 122,7 stig og er gildi hennar þar með svipað og það var í mars í fyrra. Ef marka má þessa vísitölu virðist því hafa dregið þó nokkuð úr ferðagleði landans frá því í haust, en þessi vísitala hefur hæst farið í 136,4 stig frá hruni sem var í september í fyrra.

Sem kunnugt er hafa tölur Ferðamálastofu um brottfarir Íslendinga um Leifsstöð verið til marks um að stöðugt fleiri Íslendingar láti undan útþrá sinni og haldi erlendis. Má hér nefna að á fyrstu tveimur mánuðum ársins höfðu um 42.400 Íslendingar haldið erlendis sem er aukning upp á tæp 15% frá sama tímabili í fyrra. Ef marka má þessa vísitölu Capacent þá gæti eitthvað dregið úr þessari aukningu á næstu mánuðum en engu að síður höllumst við enn að því að landinn verði nokkuð meira á faraldsfæti nú í ár en hann var í fyrra, nema eitthvað verulegt bakslag verður á efnahagsbatann hér á landi eða þá að krónan veikist verulega. Sem kunnugt er þá hefur krónan veikst þó nokkuð á síðustu mánuðum en hefur þó engu að síður verið sterkari það sem af er þessu ári en á sama tímabili í fyrra.

... eða úr áhuga hans á bifreiðakaupum?
Vísitalan fyrir bifreiðakaup lækkar um 2,4 stig frá mælingunni í desember og mælist nú 14,6 stig en hún metur líkurnar á því að einstaklingar muni kaupa sér bíl á næstu 6 mánuðum. Líkt og með vísitöluna fyrir utanlandsferðir þá hefur hún ekki verið jafn lág síðan í mars í fyrra en þá mældist gildi hennar 12,5 stig. Frá hruni hefur þessi vísitala farið hæst í 23,1 stig sem var í júní á síðasta ári. Það að vísitalan lækki nú og sé ekki hærri en raunin er m.v. sama tíma í fyrra kemur nokkuð á óvart. Í þessu sambandi má t.d. benda á tölur um nýskráningar bifreiðar hér á landi sem hafa aukist stöðugt síðasta misserið í mánuði hverjum m.v. sama tíma árið á undan. Á fyrstu tveimur mánuðum þessa árs höfðu samtals 458 bílar verið skráðir hér á landi samanborið við 250 í fyrra sem jafngildir aukningu upp á 83%. Virðist því þessi vísitala, eins og vísitalan um utanlandsferðir, vera nokkuð úr takti við þróunina að undanförnu og er því spurning hvort eitthvað bakslag kunni að vera í sigtinu í þessum efnum næsta misserið.

Líklegri nú til að ráðast í húsnæðiskaup en í fyrra
Vísitalan fyrir húsnæðiskaup mældist 6,5 stig og lækkar lítillega, eða um 0,5 stig, frá mælingunni í desember þegar hún náði sínu hæsta gildi frá hruni. Á sama tíma í fyrra mældist vísitalan 3,8 stig sem er lægsta gildi sem hún hefur farið niður í frá upphafi. Má segja að þessi vísitala, sem metur líkur á því að einstaklingur ráðist í húsnæðiskaup á næstu 6 mánuðum, sé í takti við aðrar vísbendingar um fasteignamarkaðinn en þar hefur veltan verið töluvert meiri það sem af er ári en á sama tíma í fyrra.