Rafíþróttafélagið Dusty, sem hingað til hefur verið hugsað sem keppnislið í rafíþróttum, ætlar að breikka tekjumódelið og bjóða upp á æfingar fyrir yngra fólk, í samstarfi við íslenska frumkvöðlafyrirtækið Esports Coaching Academy.
Þá ætlar Dusty að setja meira púður í streymismiðilinn Twitch, sem er orðinn mikill áhrifavaldur í markaðssetningu í rafíþróttum í dag. Ásbjörn Daníel Ásbjörnsson, stofnandi félagsins, segir í samtali við Viðskiptablaðið að streymismiðlar Dusty og tengdra aðila verði komnir á fullt fyrri hluta næsta árs. Þá munu streymi og önnur efnissköpun á vegum Dusty einnig rata inn á Youtube síðu félagsins.
„Fólk sem fylgist með rafíþróttum og horfir á streymi hjá tölvuleikjaspilurum er ekki að nota sömu miðla og margir aðrir. Það les yfirleitt ekki blöðin eða horfir á línulega dagskrá og er almennt minna að nota Instagram og Facebook. En það er mjög virkt á miðlum eins og Twitch, Youtube og TikTok. Okkar sérstaða er að geta boðið fyrirtækjum upp á heildstæða og þróaða lausn á þessum miðlum með nákvæmri endurgjöf. Hingað til höfum við boðið okkar samstarfsaðilum mest megnis upp á að auglýsa á keppnistreyjum Dusty og á þessum „hefðbundnum miðlum“ félagsins. Nú ætlum við hins vegar alla leið með þetta.“
Ásbjörn segir að árið 2022 beri þess merki að vera ár breytinga hjá félaginu, en auk þess að ætla að byrja með yngri flokka starf og herja í auknum mæli á streymi hefur Dusty einnig tryggt sér söluumboð á leikjatölvum sem og öðrum varningi fyrir tölvuleikjaspilun hjá stórum erlendum leikjatölvuframleiðanda.
„Þegar við fengum fjárfesta inn í félagið um mitt ár 2022 var það markmiðið að selja þeim ákveðna sýn. Hefðu fjárfestarnir ekki komið inn hefðum við haldið áfram á þeirri braut sem við vorum á. Það er samt ekki gaman að vera alltaf bara í status quo. Maður vill sækja áfram, prófa eitthvað nýtt og sjá hversu langt maður getur tekið þetta.“
Nánar er fjallað um rafíþróttafélagið Dusty í nýjasta tölublaði Viðskiptablaðsins sem kemur út í fyrramálið.