Andri Guðmundsson, forstjóri H.F. Verðbréfa segir afar mikilvægt að fjölga fjárfestingarkostum lífeyrissjóðanna. „Frá hruni hefur oft verið talað um að nota eigi fé lífeyrissjóðanna til að fjármagna þetta og hitt, jarðgöng og vegalagningu. Mér finnst menn þarna vera að gleyma því að við eigum lífeyrissjóðina og að þeir eiga að sinna því hlutverki einu að varðveita og ávaxta fé núverandi og væntanlegra lífeyrisþega. Fjárfestingar sjóðanna verða að vera á forsendum sjóðsfélaga, ekki annarra hagsmunaaðila í samfélaginu.“
Andri segir að sú staða sem þeir eru í núna, þar sem helmingur eigna sjóðanna er í ríkistryggðum bréfum, sé ekki heppileg. „Það er mikilvægt er að fjölga fjárfestingarkostum þeirra. Mér þætti til dæmis mjög eðlilegt að sú leið yrði skoðuð að sjóðirnir keyptu hlut í Landsvirkjun og fengju að fjármagna, með beinum eignarhlut, einstakar virkjanir og aðrar tekjuskapandi fjárfestingar. Þetta þarf ekki að vera bein einkavæðing á viðkomandi eign um og ekki endilega þarf að skrá þessi hlutabréf á markað. Það er allt annar hlutur.“
Í Viðskiptablaðinu er að finna ítarlegt viðtal við Andra. Áskrifendur geta nálgast blaðið undir liðnum Tölublöð hér að ofan.