*

laugardagur, 19. október 2019
Innlent 17. september 2019 11:27

Efling og Rvk til ríkissáttasemjara

Efling stéttarfélag vísar kjaradeilu félagsins við Reykjavíkurborg til ríkissáttasemjara.

Ritstjórn
Sólveig Anna Jónsdóttir er formaður Eflingar
Árni Sæberg

Formaður Eflingar, Sólveig Anna Jónsdóttir, sendi í gær ríkissáttasemjara skriflega beiðni um að hann taki kjaradeilu félagsins við Reykjavíkurborg til meðferðar. Í tilkynningu frá Eflingu segir að félagið líti svo á að viðræður við Reykjavíkurborg hafi reynst árangurslausar. Viðræðurnar hafa staðið yfir síðan í febrúar síðastliðinn en kjarasamningurinn sem um er deilt rann út þann 31. mars. 

Þá segir að helsta ágreiningsmálið í viðræðunum feli í sér kröfu um styttingu vinnuvikunnar. Reykjavíkurborg hafi lýst því yfir að tilraunaverkefni á þessu sviði hafi skilað jákvæðum árangri. Engu að síður hafi ekki náðst viðunandi árangur í samtali þar um milli deiluaðila. Þá hafi Eflingu ekki tekist að koma að ýmsum öðrum þáttum í kröfugerð sinni.

„Við erum með öfluga, fjölmenna og samhenta samninganefnd skipaða fólki með mikla starfsreynslu hjá borginni. Hún var einróma sammála því að vísa viðræðum, af þeirri einföldu ástæðu að kröfugerðin okkar sem skrifuð var með almennum félagsmönnum fæst í raun ekki rædd,“ sagði Sólveig Anna Jónsdóttir formaður Eflingar. „Okkur þykir miður að hafa ekki skynjað raunverulegan samningsvilja frá borginni í þessum viðræðum. Með því að vísa vonumst við til að breyta því.“