Í Hálffimm fréttum Kaupþings segir að u ndirmálslánakrísan hafi teygt arma sína til Íslands með hækkun skuldatryggingarálags bankanna og lækkun á hlutabréfamarkaði. Þannig hefur fórnarkostnaður fjármagns hækkað verulega. Þessi þróun eykur bit vaxtaaðgerða Seðlabankans og veldur mun hraðari kólnun í efnahagslífinu en áður var spáð.
Líður að lækkun vaxta
Að mati Greiningardeildar Kaupþings hefur nú myndast svigrúm fyrir Seðlabankann að fikra sig niður til lægri vaxta og því fyrr sem lækkunarferlið er hafið þeim mun betra. Lengri töf á lækkun vaxta myndi þrengja mjög þann tímaramma sem lækkunarferlið getur miðast við og leiða til mun brattari og áhættusamari vaxtalækkunarferils.
Krónan stendur veik fyrir
Greiningardeild Kaupþings gerir ráð fyrir að gengi krónunnar veikist í upphafi vaxtalækkunarferilsins á öðrum og þriðja fjórðungi þessa árs og miðast allar spár við þá forsendu. Hins vegar er vaxtamunur það mikill - og að einhverju leyti studdur af vaxtalækkunum seðlabanka í nágrannalöndum – að krónan mun áfram hafa töluverðan stuðning.
Raunvaxtakrafan á leið niður
Ávöxtunarkrafa verðtryggðra og óverðtryggðra skuldabréfa mun lækka næsta árið. Lækkunina má fyrst og fremst rekja til lækkandi stýrivaxta en við gerum ráð fyrir tiltölulega hröðu vaxtalækkunarferli Seðlabanka Íslands og að það muni hefjast nú í febrúar.
Bakslag í hagvexti
Einkaneysla dregst saman um 5% á næstu tveimur árum en hins vegar muni nýjar stóriðjufjárfestingar og auknar framkvæmdir á vegum ríkisins að einhverju leyti mæta þessum slaka. Þjóðarútgjöld dragast saman – en einungis mun mælast eins árs bakslag mælast í hagvexti samkvæmt því sem segir í Hálffimm fréttum Kaupþings.
