Pétur J. Eiríksson deilir innsýn sinni í það sem gerðist að tjaldabaki á 28 ára ferli, fram til ársins 2010, hjá Flugleiðum, FL Group og Icelandair Group í bókinni „Flug í ókyrru lofti“. Í Viðskiptablaði vikunnar eru birtir kaflar í bókinni.

Í eftirfarandi bókarkafla er farið yfir breytingarnar og baráttu félagið breyttist er móðurfélaginu Flugleiðum var breytt í FL Group árið 2005 og skammlífa forstjóratíð Ragnhildar Geirsdóttir undir stjórnarformennsku Hannesar Smárasonar.

Átök Ragnhildar og Hannesar

Strax eftir hádegi 7. september [innsk. árið 2005] , viku eftir stjórnarfundinn í FL Group, hringdi síminn. Ég sá að þetta var Ragnhildur [innsk. Ragnhildur Geirsdóttir, forstjóri FL Group] og svaraði. Ég fann á fyrstu kveðju að henni leið ekki vel.

„Ég ætlaði að láta þig vita að Hannes [innsk. Hannes Smárason, stjórnarformaður FL Group]  hefur ákveðið að Asíuverkefnið fari til Bláfugls.“ Ég hváði og hún endurtók. Þegar ég hafði náð skilaboðunum sagði ég hvasst að svona léti ég ekki segja mér í gegnum síma, það væri eðlilegra að gera það augliti til auglitis. Ragnhildur sagði mér að koma. Á leiðinni velti ég fyrir mér hvað gæti vakað fyrir Hannesi og hverslags aulaháttur þetta væri hjá forstjóranum að gefa þetta eftir.