Frjálsi lífeyrissjóðurinn, sem rekinn er af eignastýringu Kaupþings, hefur lokið endurmati eigna í samráði við löggilta endurskoðendur.
Samkvæmt bráðabirgðaútreikningum þarf ekki að skerða réttindi eða lífeyri sjóðfélaga í samtryggingahluta sjóðsins en sjóðfélagar eru rúmlega 40 þúsund.
Þetta kemur fram í tilkynningu frá sjóðnum.
„Fjármálakreppan hefur haft áhrif á lífeyrissjóðinn en aðgerðir í eignastýringu Kaupþings, sem er rekstraraðili sjóðsins, hafa á undanförnum tveimur árum miðað að því að minnka marksvisst áhættu,“ segir í tilkynningunni.
„Með auknu vægi ríkisskuldabréfa og kerfisbundinni sölu á hlutabréfum hefur tekist að draga verulega úr áhrifum fjármálakreppunnar á eignasafn Frjálsa lífeyrissjóðsins.“
Þá kemur fram í tilkynningunni að vegna fjármálakreppunnar hafa allar eignir Frjálsa lífeyrissjóðsins verið metnar upp á nýtt.
„Ljóst er að kreppan hefur haft nokkur áhrif til lækkunar á virði eigna [...] Við endurmatið er varúðar gætt og vonir standa til að niðurfærsla á eignum verði minni er reiknað er með,“ segir í tilkynningunni.
Nafnávöxtun fjárfestingarleiðanna fyrstu ellefu mánuði ársins, eftir að búið er að taka tillit til niðurfærslu, er eftirfarandi: Ávöxtun fyrstu 11 mánuði ársins Niðurfærsla eigna Frjálsi 1 -2,2% -7,3% Frjálsi 2 +12,7% -6,3% Frjálsi 3 +23,1% -2,1% Frjálsi Áhætta -3,6% -8,3%
Frjálsi lífeyrissjóðurinn heldur aukaársfund þriðjudaginn 16. desember kl. 17:15 í höfuðstöðvum Kaupþings. Lagðar verða fram tillögur um breytingar á samþykktum sjóðsins og veittar upplýsingar um rekstur og ávöxtun sjóðsins á árinu.
