*

föstudagur, 23. ágúst 2019
Innlent 13. ágúst 2019 11:40

Eimskip gegn FME fyrir Hæstarétt

Hæstiréttur hefur fallist á áfrýjunarleyfi Eimskipa í máli félagsins til ógildingar á stjórnvaldssekt Fjármálaeftirlitsins.

Jóhann Óli Eiðsson

Hæstiréttur hefur fallist á áfrýjunarleyfi Eimskipa í máli félagsins til ógildingar á stjórnvaldssekt Fjármálaeftirlitsins. Að mati Hæstaréttar kann dómur í málinu að hafa fordæmisgildi hvað varðar skýringu á innherjaupplýsingum og hvenær upplýsingaskylda samkvæmt lögum um verðbréfaviðskipti myndast.

Í málinu er deilt um ákvörðun Fjármálaeftirlitsins (FME) frá mars 2017 þar sem Eimskip gert að greiða 50 milljónir í stjórnvaldssekt. Krafa félagsins var að ákvörðunin yrði ógild með dómi. Bæði dómstig komust að þeirri niðurstöðu að ákvörðun FME hefði ekki verið háð form- eða efnisannmörkum og því ekki unnt að ógilda hana.

Upphaf deilunnar má rekja til 26. maí 2016 en þá birti Eimskip ársfjórðungsuppgjör fyrir fyrsta ársfjórðung þess árs. Þar kom fram að EBIDTA hafi aukist um tvo þriðjunga milli ára og að afkomuspá hafi verið hækkuð í 49-53 milljónir evra. Uppgjörið hafði verið samþykkt á fundi stjórnar sama dag. Degi síðar hélt félagið fjárfestakynningu þar sem farið var yfir tilkynninguna. Sama dag hækkaði gengi bréfa í félaginu um 9,25% og mánudaginn eftir, það er 30. maí, um 3,22% til viðbótar.

Drög að árshlutauppgjörinu höfðu legið fyrir 20. maí 2016 og lá bætt rekstrarafkoma þess árs þá fyrir að mati FME. Stjórnvaldið taldi að samkvæmt lögum um verðbréfaviðskipti hefði Eimskipum borið að birta upplýsingarnar eins fljótt og auðið var á jafnræðisgrundvelli eða festa birtingu þeirra. Með því að gera það ekki hefði félagið brotið gegn lögum um verðbréfaviðskipti.

Varakrafa Eimskipa hlóðar upp á lækkun sektarinnar en lögum samkvæmt skal sektin vera minnst 500 þúsund krónur og allt að 800 milljónum. Þó sé heimilt að láta þær nema 10% af heildarveltu séu brot sérstaklega alvarleg.

Stikkorð: FME Eimskip