Gengi hlutabréfa Eimskip hefur hækkað um rúmlega 16% það sem af er þessum degi. Fyrr í dag var greint frá því að bandaríska fjárfestingafélagið The Yucaipa Company hefði selt um 25% hlut sinn í félaginu og fóru þau viðskipti fram á 220 krónum á hlut en gengi bréfa Eimskip var 201 króna við lokun markaða í gær. Í þeirri tilkynningu var hins vegar ekki greint frá því hver kaupandi bréfanna væri.

Við opnun markaða í morgun hækkuðu bréf félagsins um rúmlega 10% í samræmi við kaupverð bréfanna í sölu The Yucaipa Company. Bréf félagsins hækkuðu hins vegar um 6% til viðbótar þegar tilkynnt var að Samherji Holding ehf. væri kaupandi bréfanna eins og sjá má hér (tíminn er sænskur) en tilkynnt var um hver kaupandinn var kl 11:23. Það félag er eins og nafnið gefur til kynna systurfélag Samherja hf. sem er stærsta sjávarútvegsfyrirtæki landsins. Félagið var auk þess fimmta veltuhæsta fyrirtæki á Íslandi árið 2016 með um 85 milljarða króna veltu og nam hagnaður samstæðunnar það ár rúmlega 14 milljörðum króna.