*

miðvikudagur, 21. ágúst 2019
Innlent 16. júlí 2019 17:29

Eimskip hættir siglingum til Póllands

Skipafélagið fer í samstarf við danskt skipafélag um vikulegar siglingar til Póllands í stað eigin siglinga.

Ritstjórn
Haraldur Guðjónsson

Eimskip mun frá og með næstu viku bjóða vikulegar siglingar til og frá tveimur höfnum í Póllandi og Klaipeda í Litháen. Siglingarnar eru hluti af samstarfi Eimskips við danska skipafélagið Unifeeder sem er eitt stærsta sinnar tegundar í siglingum innan Evrópu.

Eimskip hættir þar með siglingum eigin skipa til Póllands en eykur þess í stað tíðni siglinga á svæðið í samvinnu við Unifeeder. Með þessu nýja samstarfi mun Eimskip nýta siglingakerfi Unifeeder og bjóða betri þjónustu með frekari tengingu inn í Eystrasaltið að því er segir í tilkynningu félagsins. Þar með sé verið að auka þjónustu við viðskiptavini með tíðari siglingum til fleiri hafna.

Segir félagið siglingarnar henta vel hvort sem er í útflutning eða innflutning enda siglingaleiðin með tengingar við Århus og fleiri hafnir innan siglingakerfis Eimskips „Við höfum fundið fyrir aukinni eftirspurn viðskiptavina okkar á þessu svæði og erum að mæta henni með tíðari siglingum og fleiri viðkomuhöfnum,“ segir Matthías Matthíasson, framkvæmdastjóri sölusviðs Eimskips.

„Unifeeder er gríðarlega sterkt skipafélag og þetta samstarf opnar á enn frekari tækifæri með tengingu við þeirra öfluga og áreiðanlega flutninganet, bæði í Eystrasaltinu en einnig inn til Finnlands og fleiri hafna í Evrópu.“

Hér má sjá yfirlit yfir nýju siglingaáætlunina:

Útflutningur:

  • Reykjavík - miðvikudagur
  • Reyðarfjörður - fimmtudagur
  • Tórshavn í Færeyjum - föstudagur
  • Århus í Danmörku - mánudagur
  • Klaipeda í Litháen - fimmtudagur
  • Gdynia í Póllandi - föstudagur
  • Szczecin í Póllandi - laugardagur

Innflutningur:

  • Klaipedia - fimmtudagur
  • Gdynia - föstudagur
  • Szczecin - laugardagur
  • Århus - fimmtudagur
  • Reykjavík - mánudagur
Stikkorð: Eimskip Pólland Litháen siglingar Unifeeder