Ég hef lokið störfum, er ekki í neinni fastri vinnu. En þurfa menn samt ekki að lifa lífinu?“ segir fjárfestirinn Einar Sveinsson, sem nýverið flutti heimilisfesti sitt frá Bakkaflöt 10 í Garðabæ til Bretlands. Ekki liggja fyrir nánari upplýsingar um það hvar í Bretlandi Einar er búsettur.
Hann vildi ekki tjá sig um málið, hvorki um ástæðu þess að þau hjónin fluttu né hvert í Bretlandi. „Þetta er persónulegt mál,“ segir hann. Nokkur fjöldi íslenskra fjárfesta er búsettur í Bretlandi. Bræðurnir Ágúst og Lýður Guðmundssynir í Bakkavör hafa búið þar í nokkur ár. Eftir því sem næst verður komist býr Sigurður Einarsson, fyrrverandi stjórnarformaður Kaupþings, þar sömuleiðis.
