Allir nefndarmenn peningastefnunefndar Seðlabanka Íslands studdu tillögu Ásgeirs Jónssonar seðlabankastjóra um 0,5 prósentustiga hækkun stýrivaxta fyrr í mánuðinum. Þetta kemur fram í nýútkominni fundargerð peningastefnunefndar.
Það hefur ekki alltaf ríkt einhugur í peningastefnunefnd um vaxtaákvarðanir. Tveir nefndarmenn vildu meðal annars hækka stýrivexti umfram það sem nefndin ákvað á vaxtaákvörðunardögunum 25. ágúst og 6. október. Það voru þeir Gunnar Jakobsson, varaseðlabankastjóri fjármálastöðugleika, og Gylfi Zoëga hagfræðiprófessor, líkt og Viðskiptablaðið greindi frá á sínum tíma.
Seðlabankinn hækkaði stýrivexti úr 1,5% í 2,0% fyrir tveimur vikum síðan. Stýrivextir hafa verið í hækkunarferli frá því í maí.
