Viðskiptaráð segir frá því í bloggfærslu á Medium að ráðið hafi skilað inn umsögn um þingsályktunartillögu um þriðja orkupakkann. Viðskiptaráð telur að samþykkja eigi tillöguna. Ráðið segir að einu verulegu álitamálin varðandi pakkann byggist á sæstreng til Evrópu, sem ekki sé fyrir að fara hér á landi og verði ekki án samþykkis Alþingis líkt og kveðið sé á um í þingsályktunartillögu nr. 26/148 .

„Undir eðlilegum kringumstæðum kallaði innleiðing þessarar EES-gerðar ekki á ítarlega umsögn Viðskiptaráðs. Í ljósi þess hvert umræðan um málið er komin, þar sem umfangsmesta og mikilvægasta milliríkjasamningi sem Ísland hefur gert er teflt í tvísýnu, getur Viðskiptaráð ekki annað en fjallað með ítarlegum hætti um innleiðinguna og það sem raunverulega er undir í málinu: EES-samninginn,“ segir í færslu Viðskiptaráðs.

Í færslunni listar Viðskiptaráð upp helstu atriði sem það vill koma á framfæri og eru þau eftirfarandi:

  • Viðskiptaráð telur rétt að samþykkja þingsályktunartillöguna, enda styður hún við skilvirkni og samkeppni á raforkumarkaði án þess að skaða að neinu leyti hagsmuni lands og þjóðar.
  • Þrátt fyrir að Ísland hafi lagalegan rétt til að hafna innleiðingu EES-gerða eru pólitískar afleiðingar þess hins vegar óljósar og gætu skaðað hagsmuni Íslands.
  • Hagsmunir íslensku þjóðarinnar af EES-samningnum vega mun þyngra en óskilgreindir og hugsanlegir annmarkar við innleiðingu orkupakkans.
  • EES-innleiðingu hefur aldrei verið hafnað og höfnun á innleiðingu EES-gerða er neyðarúrræði sem verður að meðhöndla sem slíkt.
  • Sérhæfing og viðskipti geta hagnast öllum og eru lífsnauðsynleg litlum ríkjum. Það er keppikefli fyrir lítil ríki eins og Ísland að vera eins opin fyrir alþjóðaviðskiptum og mögulegt er.
  • EES-samningurinn hefur stuðlað að síauknum samskiptum og viðskiptum Íslands við önnur lönd og er hornsteinn í hagsæld þjóðarinnar.

Loks kveðst Viðskiptaráð vilja leiðrétta þrennt sem hefur komið fram í umræðunni:

  • Þriðji orkupakkinn skyldar ekki íslensk stjórnvöld til að leggja sæstreng.
  • Þriðji orkupakkinn gengur ekki gegn stjórnarskrá og haggar ekki yfirráðum Íslands yfir orkuauðlindum.
  • Orkupakkar 1 og 2 hafa ekki valdið hækkunum á raforkuverði.