Þrátt fyrir yfirlýsingar ráðherra í fjölmiðlum hafa stjórnvöld ekki leitað til lífeyrissjóða vegna vanda Íbúðalánasjóðs, hvorki formlega né óformlega, að sögn Gunnars Baldvinssonar, formanns Landssamtaka Lífeyrissjóða.
Íbúðalánasjóður hefur að undanförnu ítrekað brugðist við ummælum ráðamanna í fjölmiðlum með tilkynningu til Kauphallar þess efnis að ekkert nýtt sé að frétta af málinu, og að full ríkisábyrgð sé í gildi. Þegar Viðskiptablaðið óskaði eftir upplýsingum um hvort stæði til að ræða við lífeyrissjóðina, stærstu íbúðabréfaeigendurna, til lausnar á uppgreiðsluvandanum, fengust álíka svör og send hafa verið út að undanförnu. Í ljósi yfirlýsinga ráðherra má þó ljóst liggja að fyrr en síðar verður rætt við lífeyrissjóði, og mögulega fleiri fjárfesta, til lausnar á vandanum.
Nánar er fjallað um málið í Viðskiptablaðinu. Áskrifendur geta nálgast blaðið undir liðnum tölublöð hér.
