Um áramótin tók Guðmundur Ingi Ásmundsson við starfi forstjóra Landsnets en Þórður Guðmundsson hafði sinnt starfinu frá stofnun þess. Fyrirtækið fagnar í ár 10 ára afmæli sínu en óhætt er að segja að verkefnin og tækifærin fram undan hafi sjaldan verið fleiri: styrking raforkukerfisins, breytingar úr loftlínum í jarðstrengi og hugsanleg verkefni tengd sæstreng.
Nú hafa komið upp hugmyndir, meðal annars frá Steingrími J. Sigfússyni, að selja Landsnet úr eigu Landsvirkjunar sem er meirihlutaeigandi. Hvernig líst þér á þessar hugmyndir?
„Við fylgjum Evrópuregluverkinu og þar er meginstefnan sú að landsnet landanna séu sjálfstæð og óháð hagsmunaaðilum. Eins og staðan er núna erum við í eigu framleiðslufyrirtækja og þeirra sem eru að selja orku sem eru beinir hagsmunaaðilar. Í því ljósi eru settar mjög strangar reglur um hvernig þau samskipti eiga að vera. Hingað til hefur það ekki háð okkur en það er hins vegar ekki fyrirkomulag til framtíðar. Nýlega var umræða á vettvangi stjórnvalda um að breyta þessu. Í grundvallaratriðum eru tvær leiðir. Að Landsnet verði í hreinni eign ríkisins eða hin leiðin, að fyrirtækið verði alltaf í meirihlutaeigu ríkisins. Þetta eru tvær leiðir sem eru færar og við höfum ekki neina sérstaka skoðun á því.“
Myndi reksturinn breytast við breytt eignarhald?
„Það sem skiptir öllu máli fyrir okkur sem fyrirtæki er að hafa eigendur sem vilja byggja fyrirtækið upp og hafa áhuga á því.“
Nánar er fjallað um málið í Viðskiptablaðinu. Áskrifendur geta nálgast pdf-útgáfu af blaðinu með því að smella á hlekkinn Tölublöð .