Svo virðist sem þegjandi samkomulag hafi verið á meðal frambjóðenda í síðustu þingkosningum að snerta ekki á stöðu ríkisfjármála. „Stjórnarflokkar voru kannski ekki öruggir um stöðuna og stjórnarandstæðingar voru ekki á því að láta umræðu um bága stöðu ríkissjóðs trufla málflutning sinn.Nú hefur fjármálaráðherra sagt að halli ársins verði álíka og í fyrra,“ segir Hagfræðideild Landsbankans í nýjasta hefti Hagsjár sinnar. Deildin segir ummæli Sigmundar Davíðs Gunnlaugssonar ekki koma á óvart enda hafi Hagfræðideildin bent á að niðurstaðan yrði líklega á þeim nótum.
Fjárlagafrumvarp aldrei endanlegt
Hagfræðideildin rifjar upp í Hagsjá sinni að eitt meginmarkmið síðustu ríkisstjórnar var að minnka skuldsetningu og gera ríkisfjármálin sjálfbær. Þessi markmið voru sett fram árið 2009. Bent er á að ríkissjóður þurfti að taka á sig miklar skuldir í kjölfar hrunsins. Þrátt fyrir aðhald við stjórn ríkisfjármála og lága vexti á ríkisbréfum í skjóli fjármagnshafta sé ríkissjóður nú í þeirri stöðu að u.þ.b. 15% tekna hans fari í vaxtagreiðslur. Til þess að hægt sé að hefja niðurgreiðslu skulda þarf að skapa verulegan afgang í rekstri ríkisins og leita annarra leiða eins og t.d. sölu eigna. Tafir hafa orðið á þeirri viðleitni. Í stað þess að heildarjöfnuður yrði jákvæður á árinu 2013 eins og upphaflega var stefnt að hafa áætlanir færst aftur um ár.
Þá er bent á að fjárlagafrumvarpið fyrir 2013 gerði upphaflega ráð fyrir halla á heildarjöfnuði upp á 2,8 milljarða króna. Í meðförum þingsins hækkaði þessi halli og var fjárlagafrumvarpið samþykkt með 3,7 milljarða króna halla. Nú stefni í mun meiri halla.
„Niðurstöðutala fjárlaga er langt frá því að vera endanleg. Það er viðtekin venja hér á landi að fjárlög halda ekki. Útgjaldaaukning frá fjárlagafrumvarpi til fjárlaga og svo til fjáraukalaga og endanlegs ríkisreiknings er oft verleg og niðurstaða versnar oftar en ekki,“ segir Hagfræðideild Landsbankans.