„Verði ekki brugðist skjótt við með byggingu nýs fangelsis þá er alveg klárt að við erum ekki í stakk búin til að takast á við hugsanlega dómþola í þessum málum sem upp komu í kjölfar efnahagshrunsins, “ segir Páll Winkel, forstjóri fangelsismálastofnunar.
Í Viðskiptablaðinu sem kom út á fimmtudag er ítarleg úttekt á því aukna álagi sem íslenskt réttarfarskerfi stendur frammi fyrir í kjölfar efnahagshrunsins. Þar er meðal annars rætt við forsvarsmenn héraðsdóms Reykjavíkur og Fangelsismálastofnunar.
Páll segir að rými í fangelsum landsins séu í dag 130 talsins, þau séu öll fullnýtt og um 300 manns að bíða eftir því að komast í afplánun. Hann segir þó alveg ljóst að þeir sem fái brot fyrir svokölluð hvítflibbaafbrot fái enga sérmeðferð hjá fangelsismálastofnun.
„Þeir munu hefja afplánun í Hegningarhúsinu og síðan eftir atvikum flytjast á Litla Hraun eða í önnur fangelsi þar sem þeir þyrftu að vinna sér inn öll réttindi með góðri hegðun.“
Helgi I. Jónsson, dómstjóri við héraðsdóm Reykjavíkur, segir að þegar sé búið að grípa til ráðstafanna til að fjölga dómurum til að takast á við aukningu mála. Það verða þó ekki einungis sakamál á sviði efnahagsbrota sem dynja á dómstólum landsins í kjölfar bankahrunsins.
Einkamálum hefur einnig fjölgað mikið, dómstólum hefur verið gert að sinna hlutverki við gerð nauðasamninga í greiðsluaðlögun og gríðarlegt magn mála fylgir hinir ýmsu gjaldþrotum.
__________________________________
Ítarlega er fjallað um aukið álag á íslensku réttarfarskerfi í kjölfar efnahagshrunsins í nýjasta tölublaði Viðskiptablaðsins. Áskrifendur geta lesið blaðið á pdf-formi hér á vefnum og þeir sem ekki hafa lykilorð geta sótt um það hér .