Gengi rafmyntarinnar Bitcoin hækkaði um ríflega 10% yfir síðastliðna helgi og stendur nú í 10.960 dollurum. Samkvæmt frétt Reuters náði gengi myntarinnar 11.247 dollurum í nótt og hefur gengið ekki verið hærra síðan í mars á síðasta ári.

Gengi rafmyntarinnar hefur verið á flugi síðustu misseri eftir samfellda lækkun frá desember 2017 þegar myntin náði sögulegu hámarki sínu í rúmlega 17.000 dollurum til desember á síðasta ári. Á síðustu sjö dögum hefur gengi Bitcoin hækkað um 17% en gengið hefur tæplega þrefaldast það sem af er ári.

Samkvæmt frétt Reuters eru nýlegar hækkanir tengdar við bjartsýni spákaupmanna í kring um að væntanleg rafmynt Facebook, Libra, verði til þess að fleiri stórfyrirtæki muni taka upp rafmyntir. Þá eru hækkanirnar einnig tengdar við stöðu í alþjóðastjórnmálum eins og viðskiptastríð Bandaríkjanna og Kína auk spennu í Mið-Austurlöndum.