*

þriðjudagur, 22. september 2020
Fólk 8. september 2020 07:46

Elín stýrir laganámi við Bifröst

Háskólinn á Bifröst hefur ráðið Elínu Jónsdóttur, fyrrum forstjóra Bankasýslu ríkisins, sem umsjónarmann laganáms.

Ritstjórn
Elín Jónsdóttir hefur m.a. starfað sem framkvæmdastjóri eignastýringasviðs Íslandsbanka, forstjóri Bankasýslu ríkisins fyrsta starfsár hennar og framkvæmdastjóri verðbréfafyrirtækisins Arev.
Haraldur Jónasson

Elín Jónsdóttir hefur tekið til starfa sem umsjónarmaður laganáms við Háskólann á Bifröst og mun jafnframt koma að stefnumótun varðandi laganám í samstarfi við stjórnendur skólans.

Hún er lögfræðingur frá Háskóla Íslands með LL.M. gráðu frá Duke háskóla í Bandaríkjunum og MBA gráðu frá Viðskiptaháskólanum í Stokkhólmi, auk prófs í verðbréfaviðskiptum.

Elín hefur starfað við lögfræði og stjórnun og var m.a. framkvæmdastjóri eignastýringarsviðs Íslandsbanka, forstjóri Bankasýslu ríkisins og framkvæmdastjóri verðbréfafyrirtækisins Arev.

Þá hefur Elín reynslu af stjórnarstörfum m.a. sem stjórnarformaður Tryggingarmiðstöðvarinnar og Regins fasteignafélags. Elín situr nú í stjórn Borgunar hf., Skeljungs hf., og Arnrúnar hses., sem er byggingarfélag Kvennaathvarfsins.