Samherji hagnaðist um rúma ellefu milljarða króna á síðasta ári. Þetta er helmingi minni hagnaður en ári fyrr þegar fyrirtækið hagnaðist um 22 milljarða króna, en það var jafnframt besta afkoma félagsins í sögunni.
Fram kemur á vefsíðu Samherja að rekstrartekjur fyrirtækisins og dótturfélaga hafi verið rúmir 78 milljarðar króna árið 2014. Hagnaður fyrir afskriftir og fjármagnsliði nam 16,4 milljörðum króna, samanborið við 25,4 milljarða árið á undan en það ár nam söluhagnaður 8,1 milljarði. Afkoma af reglulegri starfsemi í fyrra var því mjög svipuð og árið á undan. Hagnaður fyrir tekjuskatt nam 13,7 milljörðum og að teknu tilliti til tekjuskatts var hagnaður ársins 11,2 milljarðar króna.
Hluthafar fá 1,4 milljarða í arð
Samkvæmt efnahagsreikningi námu eignir samstæðunnar í árslok samtals 116,2 milljörðum króna. Heildarskuldir og skuldbindingar á sama tíma voru 40,8 milljarðar og bókfært eigið fé 75,3 milljarðar króna. Eiginfjárhlutfall samstæðunnar var 64,8% í árslok. Veltufjármunir námu 36,7 milljörðum króna og peningalegar eignir umfram skuldir 4,2 milljörðum króna.
Arðgreiðsla til hluthafa verður 1,4 milljarðar króna sem nemur 12,4% af hagnaði félagsins samanborið við 3,3 milljarða króna arðgreiðslu vegna ársins 2013.
Fjárfestingar námu 9,4 milljörðum
Stærstu fjárfestingar Samherja á Íslandi voru vegna nýsmíði fiskiskipa að fjárhæð 2,2 milljarðar króna og kaupa á aflaheimildum fyrir 2,1 milljarð.
Erlendis voru helstu fjárfestingar í skipum hjá UK Fisheries í Bretlandi og dótturfélögum, sem eru gerðar í samstarfi við Parlevliet & van der Plas í Hollandi. Einnig var fjárfest í öðru flutningaskipi ásamt því að klárað var að lengja Baldvin NC. Þá voru keypt hlutabréf í norska félaginu Nergård og nam sú fjárfesting 1,6 milljörðum króna.
Fyrri helmingur ársins gaf ekki tilefni til bjartsýni
„Árið 2014 fór illa af stað og fyrri helmingur ársins gaf ekki tilefni til bjartsýni varðandi reksturinn. Margt spilaði þar inn í. Til dæmis tókust ekki samningar um aflaheimildir milli Noregs og Evrópusambandsins fyrr en í mars og á meðan lágu skip okkar í Evrópu bundin við bryggju. Einnig var loðnuvertíðin með allra slakasta móti og afurðaverð á ferskum þorski var lágt,“ segir Þorsteinn Már Baldvinsson, forstjóri Samherja.
Hann segir hins vegar að á seinni helmingi ársins hafi tekist að veiða og nýta vel þær heimildir sem samstæðan hafi yfir að ráða og afurðaverð hafi farið hækkandi. „Rekstrarafkoma ársins 2014 er því mjög sambærileg árinu áður sem ég get ekki annað en verið ánægður með,“ segir Þorsteinn.
Gjörbreytt landslag vegna innflutningsbanna
Fram kemur á vefsíðu Samherja að gjörbreytt landslag blasi nú við á öllum helstu mörkuðum Samherja fyrir uppsjávarafurðir, bæði vegna innflutningsbanns til Nígeríu og Rússlands.
„Innflutningsbann er til Nígeríu og gjaldeyrisskortur en þangað höfum við flutt mikið af uppsjávarafurðum og allar okkar þurrkuðu afurðir. Ekki sér fyrir endann á innflutningsbanni Rússa á íslenskar afurðir, þangað sem við fluttum afurðir fyrir vel á fimmta milljarð á síðasta ári,“ segir Þorsteinn Már.
Þorsteinn hefur hins vegar trú á því að þau mál muni leysast. Fyrirtækið muni halda áfram að rækta viðskiptasambönd við Rússland sem hafi byggst upp á löngum tíma og á gagnkvæmu trausti.
„Þriðji stóri markaður okkar fyrir uppsjávarafurðir hefur verið í Úkraínu. Þar eru aðstæður mjög erfiðar og mikill samdráttur hefur verið í innflutningi. Það eru því ærin verkefni framundan að leita leiða til að hámarka verðmæti uppsjávarafla okkar á næstu misserum,“ segir hann.
