Ef endurgreiðslur á vöxtum gengislána eiga sér stað, þá getur það leitt af sér aukna einkaneyslu og innflutning, veikara gengi, aukna verðbólgu og hækkun verðtryggðra lána.
„Það þýðir að þeir sem ekki tóku gengislánin borga hluta reikningsins í formi hærri verðbólgu,“ segir Þorbjörn Atli Sveinsson, sérfræðingur hjá greiningardeild Arion banka, spurður um hugsanleg áhrif af dómi Hæstaréttar á miðvikudag. Hann telur jafnframt að stýrivextir muni að líkindum verða hærri en ella en bendir á sem fyrirvara, að í raun sé allt of snemmt að draga einhverjar ályktanir því mikil óvissa felist í endurgreiðslunum.
„Við vitum ekki um hvaða fjárhæðir er um að ræða og á hvaða tíma þær mögulega koma til greiðslu. Eins er ómögulegt að segja til um hversu mikið fer í lækkun skulda og hvað mun fara beint í neyslu. Áhrifin til næstu 6 til 12 mánaða verða áreiðanlega mjög lítil þar sem nokkur tími mun líða þar til endanleg niðurstaða liggur fyrir,“ segir Þorbjörn Atli.