Stjórn Alþjóðagjaldeyrissjóðsins (AGS) samþykkti fjórðu endurskoðun efnahagsáætlunar Íslands og sjóðsins á fundi sínum í Washington í dag, 10. janúar. Þar með stendur íslenskum stjórnvöldum til boða lánafyrirgreiðsla sjóðsins að fjárhæð um 19 milljarðar króna. Íslenskum stjórnvöldum stendur nú einnig til boða öll sú lánafyrirgreiðsla sem Norðurlöndin höfðu boðað í tengslum við áætlunina, en dregið verður á þau lán eftir því sem nauðsyn krefur.

Þetta kemur fram i tilkynningu frá stjórnvöldum.

„Í tengslum við endurskoðunina sendu stjórnvöld sjóðnum endurnýjaða viljayfirlýsingu (e. Letter of Intent). Í yfirlýsingunni kemur fram að efnahagsleg endurreisn sé í góðum farvegi, sem sjá megi á stöðugleika krónunnar, lækkandi skuldastöðu og lítilli verðbólgu. Jákvæður viðskiptajöfnuður hafi gert stjórnvöldum kleift að kaupa erlendan gjaldeyri til styrkingar gjaldeyrisforða. Nýlegir hagvísar bendi til að eftirspurn sé hægt og rólega að ná sér á strik og búist er við jákvæðum hagvexti árið 2011.

Efnahagsáætlun ríkisstjórnarinnar byggir á fjórum meginþáttum. Í fyrsta lagi er unnið að því að byggja upp traust fjármálakerfi sem getur sinnt þörfum heimila og fyrirtækja. Í öðru lagi þarf að tryggja fjárhagslega stöðu ríkissjóðs og hins opinbera. Stór áfangi náðist í þeim efnum með samþykkt fjárlaga fyrir árið 2011, þar sem jöfnuður ríkissjóðs, að undanskildum vaxtagjöldum og –tekjum, er nánast í höfn. Í þriðja lagi verður að taka frekari skref til afnáms gjaldeyrishafta og móta peningastefnu til frambúðar. Í fjórða lagi þarf að tryggja aðlögun skulda heimila og fyrirtækja, með virkri þátttöku lánastofnana. Ný lagasetning um gengisbundin lán og samkomulag stjórnvalda, lánastofnana og lífeyrissjóða um aðgerðir í þágu heimila leggja grunninn að þeirri úrvinnslu skuldamála sem nú fer í hönd. Jafnframt hefur náðst samkomulag um hraða endurskipulagningu skulda lítilla og meðalstórra fyrirtækja. Markmið efnahagsstefnunnar er að leggja grunninn að sjálfbærum hagvexti og atvinnutækifærum til framtíðar,“ segir í tilkynningu.

Árni Páll Árnason efnahags- og viðskiptaráðherra segir í tilkynningu samþykktina mikilvægan áfanga. „Við metum mikils þau jákvæðu orð sem sjóðurinn hefur haft um þann aga sem stjórnvöld hafa sýnt við stjórn ríkisfjármála og verklag okkar við hagstjórnina. Með hraðri úrvinnslu skulda fyrirtækja og heimila greiðum við svo fyrir efnahagslegri endurreisn á næstu misserum og styðjum enn frekar við fjármálakerfið.“