Í apríl síðastliðnum lýsti forsætisnefnd Alþingis þeirri afstöðu sinni að Viðskiptablaðinu skyldi veittur aðgangur að greinargerð setts ríkisendurskoðanda í málefnum Lindarhvols ehf., án allra takmarkana. Síðar í mánuðinum sendi Ríkisendurskoðun erindi til forseta Alþingis þar sem tekin var afstaða til afhendingar greinargerðarinnar.

„Nýr ríkisendurskoðandi óskaði eftir því við settan ríkisendurskoðanda að við skil á verkefninu fylgdi með samantekt um stöðu þess til að tryggja að starfsfólk embættisins gæti sett sig inn í verkefnið með skjótum hætti og lokið því, enda lá fyrir að settur ríkisendurskoðandi hafði ekki lokið við úttektina. Í framhaldi af þessu tók settur ríkisendurskoðandi saman þá greinargerð sem nú stendur til að afhenda án takmarkana,“ segir í erindi Ríkisendurskoðunar.

Sigurður undrast þessa lýsingu og fullyrðingar Ríkisendurskoðunar sem eigi sér enga stoð í raunveruleikanum. Í samtali við Viðskiptablaðið sagði Sigurður ríkisendurskoðanda, Guðmund B. Helgason, þarna gerast sekan um ósannindi. „Þetta er nýkjörinn embættismaður að greina forseta Alþingis frá atburði sem aldrei hefur átt sér stað.“