Munck á Íslandi skilaði enn umfangsmiklu tapi á síðasta rekstrarári sem lauk 30. september síðastliðinn, að því er fram kemur í skýringum með ársreikningi Munck samstæðunnar í Danmörku. Fram að síðasta rekstrarári hafði Munck á Íslandi tapað 4,5 milljörðum á þeim þremur árum sem fyrirtækið hafði starfað hér á landi.
Munck samstæðan hagnaðist um tæpa 41 milljón danskra króna á síðasta rekstrarári eftir að hafa tapað samtals um 151 milljón danskra króna tvö rekstrarár á undan.
Í skýringum er tap verktakafyrirtækisins á Íslandi rakið til uppgjöra við viðskiptavini og áframhaldandi taps af verkefnum. Þá kemur fram að nú séu engin verkefni í gangi á Íslandi og er þar af leiðandi búist við að hagnaður samstæðunnar verði enn meiri á því rekstrarári sem nú er hafið.
Munck á Íslandi hóf starfsemi í ársbyrjun 2017 eftir að danska félagið Munck Gruppen keypti verktakafyrirtækið LNS Sögu hér á landi.
Hans Christian Munck, forstjóri samstæðunnar, höfðaði á sínum tíma mál gegn seljanda LNS sögu, hvar hann sagði að of lágt hafði verið boðið í verkefni félagsins á Íslandi.
„Þetta pirrar mig óendanlega" sagði Hans Christian við danska fjölmiðla um hans fyrsta ár í taprekstri frá því að hann hóf atvinnurekstur tvítugur.
