*

föstudagur, 22. nóvember 2019
Innlent 24. október 2019 13:49

„Engin viðbrögð“

Eigandi Gráa kattarins við Hverfisgötu segir Reykjavíkurborg ekki hafa brugðist við gagnrýni.

Ritstjórn
Grái kötturinn við Hverfisgötu þar sem fjórir veitingastaðir hafa lagt upp laupana að undanförnu.
Aðsend mynd

„Við höfum ekki fengið nein viðbrögð frá Reykjavíkurborg vegna málsins,“ segir Ásmundur Helgason, eigandi Gráa kattarins við Hverfisgötu, sem hefur gagnrýnt miklar tafir á framkvæmdum við Hverfisgötuna undanfarna mánuði. „Þá skrifaði ég sömuleiðis bréf til Umhverfis- og skipulagssviðs Reykjavíkurborgar í gær og af því er sömu sögu að segja, engin viðbrögð. Ekki orð,“ segir Ásmundur í samtali við Viðskiptablaðið, en hann skoðar nú réttastöðu sína í málinu. 

„Þegar jafnmiklar tafir valda svona miklu tjóni þá hlýtur borgin að vera bótaskyld. Annað er óréttlátt og ósanngjarnt,“ segir Ásmundur, sem vakti athygli á málinu fyrr í vikunni með skrifum á Facebook-síðu sinni. 

„Fjórir veitingastaðir farnir á hausinn við þennan spotta Hverfisgötunnar og staðurinn okkar Ellu, Grái kötturinn, rétt lafir. Uppsafnaður taprekstur frá því í sumar eykst með hverri vikunni, með hverri vikunni sem verkið tefst.“

Framkvæmdirnar hófust 20. maí sl. og áttu að vera lokið í ágúst en nú er útlit að í stað þriggja mánað framkvæmdatíma verði þeir að minnsta kosti sex. Þá segir Ásmundur að allar upplýsingar um framkvæmdatíma hafi reynst rangar. 

„Borgarstjóri sagði í ágúst að þetta myndi klárast í september. Upplýsingar frá borginni í september um að verkið myndi klárast í október reyndust líka rangar. Hvernig má það vera að verkkaupinn hefur í raun enga hugmynd um hversu langan tíma tekur að klára svona verk? Verkhlutar sem eiga að gerast í „næstu viku“, gerast þrem til fjórum vikum síðar. Allar upplýsingar um tíma hafa reynst rangar. Líka þær um hvað átti að gerast eftir hádegið í gær. Þá átti að byrja að helluleggja norðan megin - en ekkert gerðist,“ segir Ásmundur og bætir í niðurlagi færslunnar við: 

„Við sem verðum fyrir tjóni á hverjum degi höfum ekki fengið neinar skýringar, sem við getum trúað á, töfunum. Við höfum hins vegar séð hve fámennur hópur vann við verkið í sumar og fjölmarga daga var hreinlega enginn að vinna í verkinu. En Grái kötturinn er enn opinn. Og allir eru velkomnir.  Það er að segja ef þið komist í gegnum grindverkavölundarhúsið.“