Ásmundur Einar Daðason, þingflokksformaður Framsóknarflokksins, segir ljóst að Sigmundur hættir sem forsætisráðherra og Sigurður Ingi taki við. Þetta kemur fram í viðtali hans við Stundina.
Yfirlýsing Sigmundar til erlendra fjölmiðla hefur valdið miklum vangaveltum og óvissu síðan hún var birt. Í henni segir: „Í dag hefur forsætisráðherra Íslands, Sigmundur Davíð Gunnlaugsson, lagt til við þingflokk Framsóknarflokksins að varaformaður flokksins taki við forsætisráðuneytinu um ótilgreindan tíma. Forsætisráðherra hefur ekki sagt af sér og mun halda áfram formennsku í Framsóknarflokknum,“.
Orðalag yfirlýsinarinnar hefur valdið því að óljóst þykir hvort ráðstöfunin sé tímabundin eða ekki.
Í samtali við Morgunblaðið lýsti Jóhannes Þór Skúlason, aðstoðarmaður forsætisráðherra, yfirlýsingunni sem tæknilegri áréttingu. „Það var lagt til við þingflokkinn að [Sigmundur] stigi til hliðar og Sigurður Ingi tæki við embættisskyldum ráðherra um lengri eða skemmri tíma, eftir því sem semdist milli flokkanna. Þannig að þetta er nú bara nákvæmlega það sem gerðist, og bara til að svara spurningum um hvort hann sé búinn að segja af sér eða ekki. Þetta er bara tæknilega rétt,“ segir Jóhannes. Hann segir að til að segja af sér þurfi forseti að hafa veitt ráðherranum lausn, samkvæmt 15. grein stjórnarskrárinnar. „Það má vel vera að einhverjir misskilji þetta. En þetta er svona.“