*

fimmtudagur, 24. september 2020
Innlent 5. desember 2019 16:05

Enn ein falsfréttasíðan í gangi

Meðal þeirra sem nú eru sagðir græða auðveldlega eru Auðunn Blöndal og Thor „The Mountain“.

Ritstjórn
Margir halda að hægt sé að græða mikla fjármuni á því að láta aðra stunda kaup og sölu á eignum á netinu fyrir sig, þar á meðal á rafmyntum eins og Bitcoin, en einnig í gulli og öðrum góðmálmum þó ekkert sé á bakvið falssíðurnar sem þetta bjóða.
epa

Nýjasta falsfréttasíðan segir þá Auðunn Blöndal og Hafþór Júlíus Björnsson, sem lék fjallið í þáttunum Game of Thrones, hafa grætt vel á auðveldan hátt.

Síðan virðist vera enn ein tilraunin til að glepja Íslendinga til að taka þátt í einhvers konar rafmynntafjárfestingu en Viðskiptablaðið hefur sagt ítarlega frá því hvernig hermt hefur verið ítrekað eftir síðu blaðsins í álíka tilgangi.

Nú eru það fjölmiðlamaðurinn Auðunn Blöndal og Hafþór Júlíus Björnsson, eða Thor The Mountain eins og hann er kallaður í auglýsingunum sem sagðir eru hafa grætt á falsinu.

Í einni auglýsingunni er spurt hvort ferill Auðunns sé búinn fyrst hann missti eitthvað út úr sér í fjölmiðlum um málið, jafnframt er hann sagður játa gamalt hneyksli og vera flæktur í eitt slíkt.

Hafþór er hins vegar sagður hafa hætt í beinni útsendingu vegna viðkomandi lausna sem ekki á að þurfa að taka fram að lofa allt of háum vöxtum til þess að nokkur ætti að taka þær trúanlegar.