Páll Harðarson, forstjóri Kauphallarinnar, telur enn að það þurfi að vinna upp traust á hlutabréfamarkaði. Hann segir að þegar upplýsingar um kauprétti lykilstjórnenda Eimskips hafi komið fram þá sé það fjárfesta að meta hvort þeir vilji gerast hluthafar út frá þeim upplýsingum.
Páll var spurður nokkurra spurninga í tengslum við fréttaflutningi af fyrirhugaðri skráningu Eimskips á markað á vefnum Spyr.is .
Hann var m.a. spurður að því hvort engar athugasemdir eða siðareglur séu settar með samninga og/eða kaupréttarkjör lykilstjórnenda félaga sem eiga að fara á markað eins og Eimskip. Eins var hann spurður að því hvort almenn viðmið um siðferði hafi ekki bæst við í skilyrði sem fyrirtæki þurfa að vinna eftir ef og þegar þau ætla á markað.
Í svari Páls sagði:
„Kauphöllin stendur, ásamt öðrum, að leiðbeiningum um góða stjórnarhætti og fyrirtækjum ber að kynna stefnu sína í stjórnarháttum skv. reglum Kauphallarinnar. Þar að auki tryggja ákvæði í lögum og reglum Kauphallarinnar aðgang fjárfesta að upplýsingum frá fyrirtækjum. Slík ákvæði stuðla að gegnsæi á markaði en fjárfestum er þannig gefinn kostur á að móta sér afstöðu gagnvart þeim upplýsingum sem frá fyrirtækjunum koma, þ. á m. er varða siðferðisleg atriði. Kauphöllin reynir að tryggja þetta gegnsæi en stendur að öðru leyti á hlutlausum grunni.“
Stjórnir ráða öllu um kaupréttarsamninga
Þá svaraði Páll því til að Kauphöllin komi ekki að gerð kaupréttarsamninga einstakra fyrirtækja. Það sé eingöngu í höndum stjórna viðkomandi fyrirtækja.
„Í anda þess gegnsæis sem Kauphöllin reynir að tryggja, þá ráða lífeyrissjóðir og aðrir fjárfestar ferðinni þegar kemur að því að meta og bregðast við þeim upplýsingum sem þeim berast, eins og til dæmis upplýsingum um kaupréttarsamninga.“
Fallið var frá kaupréttarsamningunum við lykilstjórnendur Eimskips í síðustu viku vegna þrýstings frá lífeyrissjóðum.