Velta á fasteignamarkaði á höfuðborgarsvæðinu í vikunni nærri tvöfaldaðist milli vikna og nam rétt tæpum 1,4 milljarði króna samkvæmt upplýsingum frá Fasteignaskrá Íslands (áður Fasteignamat ríkisins).
Veltan í vikunni þar á undan nam rúmum 700 milljónum króna en þetta er aðeins í þriðja skipti sem vikuveltan á fasteignamarkaði fer yfir milljarð króna frá því í byrjun desember.
Meðalvelta á viku á síðasta ári var rúmir 2,1 milljarðar. Þá er meðalvelta síðustu fjórar vikur rétt rúmur milljarður eða 1.034 milljónir króna en meðalvelta frá áramótum er um 935 milljónir á viku.
Um miðjan janúar fór 12 vikna meðalvelta undir milljarð króna í fyrsta skipti í tæpan áratug og nú er 12 vikna meðalvelta um 860 milljónir króna.
Á myndinni hér að ofan má sjá breytingu á fjögurra vikna meðalveltu á milli ára sem hefur minnkað um 70% milli ára. Fasteignasala sveiflast gjarnan mikið á milli vikna og þess vegna er horft til meðalveltu fjögurra vikna og breytinga á henni milli ára.
Fjöldi þinglýstra kaupsamninga var 35 í vikunni en 29 samningum var þinglýst í vikunni þar áður. Að meðaltali var 66 samningum þinglýst á viku á síðasta ári en frá áramótum hefur 31 samningi verið þinglýst að meðaltali á viku.
Meðalupphæð á hvern samning var í vikunni 40 milljónir króna og lækkar um tæpar 16 milljónir milli vikna. Það er nokkuð yfir meðaltali en meðalupphæð á hvern samning á síðasta ári voru tæpar 32 milljón krónur en hefur verið 30 milljónir frá áramótum.
Á ársgrundvelli hefur velta á fasteignamarkaði dregist saman um 58% og gefur það heildstæðari mynd af fasteignamarkaði. Kaupsamningum hefur fækkað milli ára og er vægi hvers kaupsamnings meira fyrir vikið. Auk þess getur hver samningur falið í sér fleiri en eina eign auk þess sem eignir eru mismunandi.
