Þrátt fyrir gjaldeyrishöft, pólitískan óróleika og skattahækkanir að undanförnu hefur áhugi á Íslandi sem kosti fyrir erlenda fjárfesta vaxið mikið eftir hrun, að sögn Þórðar Hilmarssonar, framkvæmdastjóra Íslandsstofu. „Við finnum fyrir auknum áhuga og fyrirspurnum úr margvíslegum atvinnugreinum. Fyrirspurnum í orkuiðnaði fjölgar jafnt og þétt auk þess sem nýr iðnaður hefur komið inn á okkar borð. Það sem er jákvætt er að það sem voru fyrirspurnir fyrir tólf til átján mánuðum er orðið að raunverulegri fjárfestingu nú,“ segir Þórður.
Hann nefnir sem dæmi minkarækt á jörðinni Héraðsdal í Skagafirði. Þar hafa danskir loðdýrabændur sett upp minkabú. Þórður segir erlenda fjárfesta, m.a. frá Danmörku og Hollandi, hafa sýnt því áhuga að undanförnu að koma með fé inn í loðdýraræktina. „Minkarækt er nú ekki alltaf til umræðu hér á landi en þessi geiri hefur verið að ná gríðarlega góðum árangri að undanförnu. Erlendir fjárfestar virðast taka mun betur eftir þeim tækifærum sem felast í þessum iðnaði heldur en Íslendingar. Það er jákvætt að fá erlenda fjárfestingu inn í þennan iðnað.“ Þórður segir þennan aukna áhuga á minkarækt ekki aðeins vera tilkominn vegna veikrar krónu og þar með lágs framleiðslukostnaðar, heldur ekki síður því að skinn frá Íslandi hafi verið að seljast á hæsta verði á erlendum mörkuðum. „Iðnaðurinn hér á landi hefur orð á sér fyrir að vera gæðaiðnaður og ekki síst þess vegna er áhuginn að vaxa,“ segir Þórður.
Nánar er fjallað um málið í Viðskiptablaðinu sem kom út í dag. Áskrifendur geta nálgast blaðið hér að ofan undir liðnum Tölublöð.