Ölgerðin á í deilum við fjármögnunarfyrirtækið Lýsingu vegna kaupa á bílum í bílaflota félagsins. Málið er rekið fyrir dómstólum. Heyra má á Andra Þór Guðmundssyni, forstjóra Ölgerðarinnar, að málið hrjáir hann.
„Þeir hjá Lýsingu hafa verið mjög óbilgjarnir í sinni afstöðu,“ segir Andri Þór aðspurður um þetta.
„Við erum yfirleitt með bílaflota upp á um 100 bíla en núna erum við með um 40 ónotaða bíla sem við fáum ekki að selja vegna þess að við eigum í deilum við Lýsingu. Við höfum boðist til þess að selja bílana og leggja söluandvirðið til hliðar inn á bundinn reikning þangað til að leyst verður úr því máli fyrir dómstólum – en fáum það ekki í gegn. Í sjálfu sér er ekkert óeðlilegt við það að fá úrskurð dómstóla þegar upp kemur ágreiningur, en menn ættu nú almennt að bera gæfu til þess að geta unnið saman á meðan. Það er hvorugum aðilum til hagsbóta að láta 40 bíla, sem líklega eru metnir á um 100 milljónir, grotna niður og rýrna í verði. Það er hvorugum aðilanum í hag.“
Andri segir nýjasta útspil Lýsingar í þessu máli hafa verið að bjóða Ölgerðinni að taka lán hjá félaginu til að kaupa nýja bíla í flotann.
„Í raun og veru er þetta galin afstaða og það yrði fróðlegt að sjá hvernig Samkeppniseftirlitið bregst við svona vinnubrögðum,“ segir hann.
Andri Þór er í ítarlegu viðtali í Viðskiptablaðinu sem kom út í vikunni. Áskrifendur geta nálgast það og blaðið undir liðnum tölublöð hér að ofan.
