Eftirlitsstofnun EFTA (ESA) telur að íslenska leigubifreiðalöggjöfin takmarki aðgengi að markaðnum og sé að því leyti í andstöðu við ákvæði EES-samningsins. Stofnunin sendi íslenskum stjórnvöldum bréf þess efnis í dag og veitti þeim tveggja mánaða frest til að bregðast við. Að öðrum kosti kunni stofnunin að höfða samningsbrotamál fyrir EFTA-dómstólnum.
Þetta kemur fram í fréttatilkynningu frá ESA. Í yfirlýsingunni segir að núverandi reglur séu ekki hlutlægar og hygli þeim sem slík leyfi hafa. Það feli í sér hindrun fyrir nýja aðila til að hefja starfsemi á markaðnum.
„Að fjarlægja óréttmætar hindranir til að hefja störf í hvaða atvinnugrein sem er er mikilvægt fyrir góða og fulla framkvæmd innri markaðarins,“ er haft eftir Frank J. Büchel, stjórnarmanni ESA, í tilkynningunni. „Með því að fjarlægja hindranir að leigubifreiðamarkaðinum er hægt að stuðla að nýsköpun í atvinnugreininni sem leiðir til lægri fargjalda, betri þjónustu og fleiri valmöguleika fyrir neytendur.“
Frumvarp um breytta skipan á markaðnum var lagt fram á þingi í nóvember 2019 en fékk ekki afgreiðslu úr umhverfis- og samgöngunefnd. Það var lagt fram í nær óbreyttri mynd á fyrsta degi þessa þings, það er 1. október 2020, og hefur fyrstu umræðu verið lokið. Síðast var fjallað um málið í nefnd þann 16. nóvember síðastliðinn og hefur þingnefndin ekki afgreitt málið frá sér.
