Eftirlitsstofnun EFTA (ESA) ákvað í dag að hefja formlega rannsókn á hugsanlegri ríkisaðstoð í tengslum við lánssaminga milli Seðlabanka Íslands og Íslandsbanka hf. og Seðlabanka Íslands og Arion banka hf. Skoðun á málinu kemur í kjölfar þess að kvörtun barst stofnuninni. Þetta kemur fram á vef stofnunarinnar .

Þar kemur fram að málið varði tvo aðskilda skuldbreytingarsamninga á milli Seðlabanka Íslands og Íslandsbanka (áður Glitnir) og Arion banka (áður Kaupþing). Samningarnir voru undirritaðir í september og nóvember 2009. Með samningunum var skammtíma veðlánum og verðbréfalánum frá Seðlabanka Íslands skuldbreytt í lán til langs tíma.

„Umrædd skammtíma veðlán voru á sínum tíma veitt með veði í ýmsum skuldabréfum, þar á meðal veðum í húsnæðislánasafni bankanna tveggja. Við endurfjármögnun nýju bankanna (Íslandsbanka og Arion banka), voru innlendar eignir og skuldbindingar forvera þeirra, Glitnis and Kaupþings, færðar til nýju bankanna. Þar á meðal voru skuldbindingar gagnvart Seðlabanka Íslands. Þar sem skuldir bankanna við Seðlabankann voru í formi skammtíma veðlána hefði tafarlaus endurgreiðsla haft veruleg áhrif á lausafjárstöðu nýju bankanna tveggja,“ segir í tilkynningu ESA.

Varði hagsmuni sína

Seðlabanki Íslands mun halda því fram að með skuldbreytingunni hafi Seðlabankinn verið að verja hagsmuni sína og hámarka endurheimtur af lánunum. Umræddar ráðstafanir hafi því verið í samræmi við það sem almennur lánveitandi hefði gert í sömu stöðu. ESA telur hins vegar tilefni til þess að rannsaka hvort þeir lánaskilmálar sem Seðlabanki Íslands samþykkti hafi verið í samræmi við markaðskjör. Sé svo ekki kunni þeir að fela í sér ólögmæta ríkisaðstoð í skilningi EES-samningssins.

ESA hefur kallað eftir athugasemdum og upplýsingum frá íslenskum yfirvöldum vegna málsins. Þá kallar hún jafnframt eftir athugasemdum frá þeim aðilum sem telja sig eiga hagsmuna að gæta.