*

þriðjudagur, 26. maí 2020
Innlent 28. febrúar 2020 19:12

EVE Fanfest aflýst

Skipuleggjendur EVE Fanfest hafa ákveðið að aflýsa hátíðinni, sem átti að fara fram í Hörpu eftir um mánuð vegna kórónuveirunnar.

Ritstjórn
EVE Fanfest hefur undanfarin ár verið ein af stærstu ráðstefnum eða sýningum sem haldnar eru hérlendis.

Leikjaframleiðandinn CCP hefur ákveðið að aflýsa EVE Fanfest, sem fara átti fram í Hörpu í Reykjavík 2.-4. apríl, vegna kórónuveirunnar (COVID-19). Í fréttatilkynningu vegna málsins segja skipuleggjendur hátíðarinnar ákvörðunina erfiða en nauðsynleg í ljósi aðstæðna. Hjá ýmsum alþjóðlegum fyrirtækjum séu nú í gildi takmarkanir á lengri ferðalögum starfsmanna.

„Eftir ítarlega greiningu á áhrifum þessara ráðstafana á skráða þátttakendur á Fanfest, sem og þeirri staðreynd að margir spilarar EVE sem sæki hátíðina komi um langan veg og frá öllum heimshornum, hafi verið ljóst að óhjákvæmilegt væri að hætta við hátíðina í ár. Ákvörðunin hafi verið tekin að vandlega íhuguðu máli," segir í tilkynningunni.

Í tilkynningu, sem CCP hefur sent spilurum EVE Online, segir að eflaust muni þessi ákvörðun valda einhverjum þeirra vonbrigðum en þeir muni vonandi sýna aðstæðunum skilning.

Þetta hefði verið í 15. sinn sem EVE Fanfest færi fram. Hátíðin nýtur mikilla vinsælda um heim allan og var búist við um þúsund spilurum alls staðar að úr heiminum hingað til lands.

Stikkorð: CCP Fanfest EVE