Líkast til mun taka alls fjögur ár að semja um aðild að Evrópusambandinu og innleiða evru á Íslandi að því loknu, segja þeir Eiríkur Bergmann Einarsson og Jón Þór Sturluson í nýrri bók sinni: Hvað með evruna? „Evran er því langtímamál og mun ekki duga sem lausn á skammtímavanda í íslensku efnahagslífi,“ segir í bókinni. Evrópufræðasetur Háskólans á Bifröst gefur út bókina.
Eiríkur Bergmann er dósent í stjórnmálafræði og forstöðumaður Evrópufræðasetursins á Bifröst. Jón Þór er doktor í hagfræði og dósent við Háskólann í Reykjavík. Hann er einnig aðstoðarmaður viðskiptaráðherra.
Í bókinni er komist að þeirri niðurstöðu að Ísland eigi aðeins tvo raunhæfa kosti í peningamálum. Annað hvort að viðhalda núverandi stefnu með sjálfstæðri krónu á floti eða að ganga í Efnahags- og myntbandalag Evrópu og taka upp evru. „Ef ríki hefur á annað borð kost á fullri aðild að myntbandalagi Evrópu er vandséð hvaða hag það hefur af því að taka evruna upp einhliða.“
Í bókinni er meðal annars fjallað um hvaða áhrif innleiðing evru myndi hafa fyrir íslenskt efnahagslíf og samfélag. „Stutta svarið er nokkuð skýrt: Í fyrsta lagi verður hagkerfið stöðugra, vextir lægri og viðskiptakostnaður minni.Þá má gera ráð fyrir að viðskipti aukist þegar gengisáhætta minnkar. Verðlag ætti að lækka og kaupmáttur að aukast. Helsti ókosturinn er á móti sá að Seðlabanki Íslands missir úr eigin hendi ákvörðun um innlenda stýrivexti. Við upptöku evru verður heldur ekki hægt að lækka raunlaun með því að fella gengið sem getur valdið ákveðnum erfiðleikum á vinnumarkaði,“ segir í niðurstöðum bókarinnar.
Nánar er fjallað um málið í Viðskiptablaðinu í dag. Áskrifendur geta lesið blaðið á pdf-formi hér á vefnum. Þeir áskrifendur sem ekki hafa sótt um aðgangsorð til að lesa blaðið á vefnum geta gert það hér .
